10 Ribee Boh Paket Sembako Geupeusiap keu Ureueng Tanyoe Aceh di Malaysia

Plt Gubernur Aceh, Nova Iriansyah, watee geujok bantuan sembako keu rumoh yang keunoeng dampak taeun Corona di keu kanto Dinsos Aceh, Hameh (9/4). Foto: Dok. Humas Setda Aceh

Pomeurintah Aceh ka geupeusiap 10 ribee boh paket sembako keu geujakbantu ureueng Aceh yang na disideh Malaysia. Awak Aceh nyang keuneuk bantu nyan na keuh nyang ka gadoh buet seubab teuka peunyaket taeun Corona nyang na lam donya jinoe.

Meunan geupeugah le Pak Jubir Pomeurintah Aceh, Saifullah Abdulgani yang seureng dihoi SAG bak kamoe uroenyoe, Hameh (30/4). Bantuan nyang saboh paket meuyum 50 ringget peng Malaysia nyan nakeuh keu geupeutroh kiban nyang ka geupeugah le ubena ureueng Aceh yang na blah deh bak 23 April ka ulikot.

SAG geukheun haba yang ka troh dari ureueng tanyoe blahdeh nakeuh geulakee Pomeurintah Aceh keu geucok saboh tindakan nyak troh kebutuhan lam masa darurat seubab tauen Corona nyoe keu awak tanyoe nyang na disideh Malaysia.

Gopnyan geupeutrang, bantuan nyan akan geujoek keu ureueng geutanyoe nyang na blahdeh roet awak Kedutaan Basar Indonesia di Malaysia. Peulaksana buet Gubernur Aceh, Pak Nova Iriansyah, kalheuh geukirem surat u Ulee Kawan BNPB seulaku Keutuha Gugus Tugas Penanganan COVID-19. Surat nyan na geukirem chit keu Meuntroe Lua Nanggroe Republik Indonesia.

SAG geupeujeulah, ngon surat nibak tanggai 27 April 2020 nyan Pak Plt Gubernur Aceh ka geulakee Ulee Kawan Gugus Tugas Penanganan COVID-19 ngon Meuntroe Lua Nanggroe nyak geuyue Kedutaan Besar Indonesia di Malaysia keu geubantu peutroh bantuan sembako nyan bak urueung geutanyoe yang na blahdeh.

"Kamoe sabe saleng meubri haba ngon keumeuntrian lua nanggroe seureuta jajaran awak nyan lam meupeuseulusoe tiep masalah nyang geuhadapi le masyarakat Aceh nyang na di lua nanggroe," kheun SAG.

Mahasiswa lua nanggroe ngon mahasiswa lua daerah nyang na di Aceh ka meurumpok bantuan sembako dari pomeurintah Aceh. Foto: Dok. Humas Setda Aceh

Seulaen nyan, SAG geutamah lom, Pomeurintah Aceh bak uroe Seulanyan (27/4) kalheuh cyit geujak peutroh bantuan keu awak mahasiswa lua nanggroe ngon lua daerah Aceh nyang na bak asrama Unsyiah di Darussalam, Banda Aceh.

Bantuan nyan geujok bak uroe nyan banmandum na keuh 500 kilo breuh, 200 lite minyeuk makan, 1.500 boh manok ngon saboh kotak asoe na meusireutoh on masker ija.

Mahasiswa inan bak asrama Unsyiah na meu 107 droe. 60 droe awak nyan nakeuh mahasiswa dari lua nanggroe, seulaen nyan awak lua daerah Aceh.

Nyang awak lua nanggroe na keuh nyang dari Zambia, Nigeria, Malaysia, Timor Leste, Tajikistan, Thailand, Kenya, Senegal, ngon Afganistan. Laen nyang lua daerah Aceh awak nyan na yang dari Kalimantan, Jawa Tengah, Sulawesi, ngon Papua.[]

Note: berita dalam bahasa daerah (Aceh) ini disampaikan sesuai kebijakan dari kumparan untuk para partner 1001 Media, bertujuan melestarikan bahasa daerah.