Jikok PSBB Jadi, Pemerintah di Sumbar Alah Sadioan Pitih Rp1,5 Triliun

Nasrul Abit, Wakia Gubernur Sumbar (Foto: Zulfikar/Langkan.id)

Kalau iyo sabana ka jadi dan dapek izin dari Menteri Kesehatan mambateh garak urang sacaro laweh nan disabuik PSBB dek urang kini tu, mako pemerintah Sumatera Barat alah manyadioan pitih sabanyak Rp500 miliar untuak itu.

Indak tangguang-tangguang lai do, pitih nan Rp500 miliar tu dibagi duo, ciek untuak tahap partamu, pitihnyo Rp250 miliar, sudah tu sisonya Rp250 miliar lai digunoan tahap kaduo untuak mambateh garak urang-urang di Sumbar ko.

Kecek Wakia Gubernur Sumbar, Nasrul Abit, jikok iyo bana lai dapek izin dari Menteri Kesehatan, pitih untuak mambateh garak urang Sumbar tu alah ado, tamasuak jo nan tahap kaduo tu bagai. Tapi, jikok lai sabana jadi dikarajoan.

"Indak itu sajo do, pemerintah nan di kabupaten jo kota, juo alah ado ituang-ituangan pitihnyo. Kalau diituang bana, dipakiroan sampai Rp915 miliar lo, itu pitih nan di kabupaten jo kota sajo, alun nan Rp500 juta di provinsi tu," kecek Nasrul, Rabu (15/4).

Kalau ditotalkan sadonyo, kato Nasrul, tamasuak jo pitih nan di kabupaten jo kota tu bagai, sampai Rp1,5 trilun tu mah. Tapi, yo baitulah, nan kabupaten jo kota ko, iyo indak samo rato pitihnyo do, ado nan gadang ado lo nan ketek, karano urang-urang ko babeda lo pitih masuaknyo.

"Kito iyo sabana baharok, bantuan nan dari provinsi ditololng pulo jo kebijakan nan ado di daerah, bia labiah jaleh kama painyo," kato Nasrul.

Sudah tu, pitih nan Rp1,5 triliun ko, kecek Nasrul, nan jaleh bana nan Rp500 miliar nan dari provinsi, itu alah baretong bana jo anggota dewan (DPRD). Pitih itu digunoan untuak mambantu masyarakaik bagai.

"Kami bantu masyarakaik ko salamo tigo bulan. Tapi, kini nan manjadi masalah bana, kito masih taambek jo data masyarakaik ko, nan per namo jo per alamaik ko a," jalehnyo.

-----

*kumparanDerma membuka campaign crowdfunding untuk bantu pencegahan penyebaran corona virus. Yuk, bantu donasi sekarang!