Bupati Tegal Njaluk Pejabat Nglarisi Dodolané Wongé Déwék

Bupati Tegal Umi Azizah memantau protokol kesehatan di Pasar Trayeman, Slawi. (Foto: Dok Humas Pemkab Tegal)

SLAWI — Bupati Tegal Umi Azizah ngejak pejabat nang lingkungan Pemkab nggo mborong produk usaha mikro, kecil, dan menengah (UMKM). Umi uga ngejak wargané sing nduwéni kepedulian lan rejeki luwih ébén nglakoni aksi sing padha.

Pesen kuwé disampékna Umi nalika nyanangna gerakan "Nglarisi Jajan Wonge Dewek" nang aula Dinas Perdagangan, Koperasi dan UKM (DisdagkopUKM) Kabupatén Tegal, dina Rebo (04/08/2021).

Gerakan sing diinisiasi DisdagkopUKM Kabupatén Tegal kuwé bagian seka kampanye Gerakan Nasional Bangga Buatan Indonesia. Umi nganggep, gerakan tuku produk UMKM pan ngréwangi pelaku usahané bertahan urip, malah tetep mlayu nang wayah pageblug.

Pembatasan pergerakan lan kegiatan masarakat nggo meték nularé Covid-19 kiyé, Umi pesen, aja dadi aling-aling pemasaran produk UMKM.

"Pelaku UMKM kudu bisa nduwé inovasi, manfaatna layanan pesen antar, masarna produk lan karya usahané nganggo cara onlén metung média sosial utawané chating ngantikan platform marketplace," omongé Umi.

Jaréné, platform média sosial lan marketplace saiki wis dadi sarana dodolan sing lumayan éféktif nggo pelaku usaha tanpa kudu nduwéni toko utawa tempat dodolan. Kaya kuwé uga karo métode pembayarané uga olih dilakoni metung transfer duwit digital liwat pirang-pirang aplikasi duwit éléktronik utawa é-money ngantikan maring prosés pengiriman barangé sing bisa manfaatna jasa ojég onlén.

"Nyong nyawang penting peran UMKM kiyé dadi penopang perékonomian nasional sing urun-rembug ngantikan 57,8 persén PDB nasional lan mresepi sekitar 97 persén lapangan kerja," jaré Umi nang adepan perwakilan pirang-pirang pelaku UMKM sing njajakna barang dagangané nang tempat acara.

Umi duwé pendapat ari pageblug Covid-19 wis meték uripé ékonomi pelaku usaha cilik, usaha mikro lan ultra mikro. Malah ora sacuil nang antarané sing latané nglempuruk soalé penghasilan hariané mlorod.

Mugané kuwé, Pemréntah, jaré Umi, terus ngglontorna program stimulus ékonomi lan bansos maring pelaku UMKM sing keimbas Covid-19 kaya bantuan produktif usaha mikro (BPUM), krédit usaha rakyat (KUR) ngantikan restrukturisasi krédit usaha nang séktor keuangan.

Senajan kaya kuwé, Umi nyampékna angger gerakan "Nglarisi Jajan Wonge Dewek" ora mandeg mung slogan. Kudu ana aksi nyata seka pemréntah kaya para pejabaté toli wargané nggo tuku produk-produk UMKM.

"Ora mung tuku, kirané dhéwék kabéh nang kéné uga bisa duwé peran dadi agén pemasaran produk UMKM. Dhéwék, metung konsép "Jalabia" utawa jualan bareng Umi-Ardie, mélu ngréwangi masarna produk-produk UMKM sing alhamdulillah sawisé dhéwék unggah profil usahané maring média sosial jebulé ana peningkatan pesenan seka konsumén," pungkasé. (*)