News
·
20 April 2021 22:50

Wong sing Nguntit Mobil Anak Wadoné Bupati Brebes Jebulé Pecatan Polisi

Konten ini diproduksi oleh PanturaPost
Wong sing Nguntit Mobil Anak Wadoné Bupati Brebes Jebulé Pecatan Polisi (83625)
Penguntit anak wadoné Bupati Brebes sing jebulé pecatan polisi dibedhil sikilé.
BREBES — Zaky Rohman (34) pelaku sing nguntit mobil anak wadoné Bupati Brebes jebulé pecatan anggota polisi. Dhéwéké dipecat neng taun 2009 gara-gara kasus ngrampas mobil.
ADVERTISEMENT
Hal kuwé dibenerna daning Kapolrés Brebes, AKBP Gatot Yulianto wayah jumpa pérs nang Latar Satréskrim Polrés Brebes, dina Senén, 19 April 2021.
“Ya pelaku kiyé pecatan anggota polisi (Polrés Garut) taun 2009 wingi merga kasus ngrampas mobil. Nggo kasus kiyé, modus utawa motifé ésih dislidiki luwih lanjut. Soalé nganti saiki pelaku durung bisa dijaluki keterangan merga ésih kepengaruh narkoba,” omongé Gatot Yulianto.
Saliyané nguntit mobilé anaké bupati, pelaku uga sempet nyoba nglawan petugas. Wayah dipriksa daning polisi, pelaku sempet keséwoten lan ngancem petugas karo lading lan minggat.
“Ditakoni idéntitasé ngamuk, sewot lan nantang petugas. Latané mlayu maring mobil lan ngetokna lading,” jaréné.
Polisi ya langsung ngoyok pelaku lan akhiré bisa nangkep. Polisi uga mbedhil pelaku nang nggon kémpolé. “Tim Resmob berhasil nyergap pelaku nang gili gedhé Pantura perbatesan Brebes-Tegal nang Sumurpanggang. Pelaku karo barang buktiné diamankna,” ungkapé.
ADVERTISEMENT
Ana pirang barang bukti sing diamankna petugas, nang antarané blati, HaPé android, pipa wesi bekas bodholan rajeg Mapolrés, pirang-pirang plat nomer mobil palsu, lan 8 gram sabu-sabu karo alat sing nggo nyedot.
“Kondisi pelaku ésih durung stabil, dhéwék ésih ngenténi nggo nglakoni pemeriksaan luwih lanjut. Nggo tunané ésih diétung ndisit,” jelasé.
Pantauan nang lokasi, rajeg wesi Mapolrés sing bodhol wis molai didandani. Lah, angger kondisi mobilé pelaku ringsek nang nggon ngarep lan iringan. Mobil sing ditumpaki anaké bupati uga bodhol nang nggon iringané. (*)