Gubernur Aceh Meurumpok Peunghargaan dari Perpustakaan Nasional

Piagam peunghargaan nyang dibri le Keupala Perpustakaan Nasional keu Bapak Gubernur Aceh, Nova Iriansyah. Foto: Dok. Humas Setda Aceh

Perpustakaan Nasional (Perpurnas) ka geubri saboh peunghargaan keu Gubernur Aceh, Nova Iriansyah. Peunghargaan nyan dibri keu Pak Nova seubab rayeuk na roh langsong lam geubina dan geukeumbangkan perpustakaan seureta geupeutimoh seumangat galak meubaca di Aceh.

Meunan geupeutroh le Keupala Dinah Kearsipan dan Perpustakaan Aceh, Ruslan Abdulgani, lam haba meutuleh yang kamoe teurimong nibak uroenyoe, Rabu (18/11). Gopnyan geupeugah bahwasajih Keupala Perpustakaan Nasional Bapak Muhammad Syarif Bando geunilai Pak Nova meuseumangat rayeuk that bak geupeumaju perpustakaan.

Meunurot gopnyan, saboh buet nyang ka lumah na keuh Pemerintah Aceh ka lheuh geubri dukungan beulanja nyang lumayan rayeuk keu geupeudoeng pustaka wilayah.

Gubernur Aceh Nova Iriansyah watee geutinjoe UNBK di Banda Aceh, thon 2019. Foto: Suparta/acehkini

Miseu kalheuh teudong pustaka wilayah nyan akan jeut keu nyang paleng lagak ngon meugah lam nanggroe Indonesia nyoe. Keupala Perpustakaan Nasional teusangjong that ateuh peuhatian gubernur tanyoe, meunan geupeugah le Pak Ruslan.

Seulaen nyan, kheun Pak Ruslan, peunghargaan dari Perpustakaan Nasional keu Gubernur Aceh geubri ateuh useuha geukeumbangkan perpustakaan sampoe u gampong-gampong di Aceh.

Ruslan geupeusampoe chit seulaen keu Pak Gubernur Aceh, Perpustakaan Nasional na chit geubri piagam peunghargaan keu Perpustakaan Baiturrahim Gampong Cot Seumeureng di Aceh Barat seubagoe juara harapan lhee (III) klaster B lam lomba perpustakaan umum gampong tiengkat nasional.

Meunurot gopnyan, peunghargaan nyan dibri lam rangka geutingkatkan kualitas pengelolaan perpustakaan umum.[]

Note: berita dalam bahasa daerah (Aceh) ini disampaikan sesuai kebijakan dari kumparan untuk para partner 1001 media, bertujuan melestarikan bahasa daerah.