Nyoe Buet Awak Gampong Lambung di Aceh Bak Peujioh Corona, Sep Bereh Kiraju

Moto nyang tameng bak pinto tameng Gampong Lambung, disomprot disinfektan. Foto: Abdul Hadi/acehkini

Gampong Lambung di Kota Banda Aceh mulai akhe buleun Maret 2020 ka geugunci gampong, sebagoe salah saboh useha geupeujioh nibak peunyaket taeun corona atawa COVID-19. Ubena juroeng tamoeng lam gampong geutoeb, nyang geubuka na keuh saboh pinto juroeng sagai untuk geutubiet-tamoeng ureung.

Bak juroeng nyang geubuka saboh nyan, na awak jaga sabe meugantoe-gantoe. Peurangkat Gampong Lambung ka seupakat geutham ubena urueng gampong, beu teutap bak rumoh mantong. Tiep jamee nyang tamong lam Gampong Lambung geupareksa, dan mandum nyang tubiet-tamoeng geusomprot disinfektan. Sep bereh ken?

Geujak bagi bantuan u rumoh-rumoh, hana cilet-cilet. Foto: Abdul Hadi/acehkini

Siuroe lheuh geugunci gampong, ubena nyang meucatat seubagoe urueng Gampong Lambung geubri saboh sak breuh, tamah saboh leumpeng boh manoek, minyeuk maguen ngon sikilo saka sapo. Bantuan nyan geujak intat langsong u rumoh-rumoh, dan ureung po rumoh watee geuteurimong, geusemprot caeran peugleh jaroe dilee. Hana berangkaho ju, meunan peurintah geu jok le keuchik.

Keuchik Gampong Lambung, Yasir, watee acehkini talipun bak uroe Sabtu (4/4) geupeugah, jinoe lam gampong ka geubuka pasai, nyak bek that geutubiet ureung jak beulanja u pasai. Bek ula-uli keunoe keudeh lam wabah taeun corona nyoe.

Pasai nyang geubuka lam Gampong Lambung kiban cara ureung bek geutubiet jak beulanja u luwa. Foto: Abdul Hadi/acehkini

Geuchik Yasir geutamah, pasai nyan na keuh geupeuget lheuh geugunci gompong padum-padum uroe nyang ka ulikot. "Wareuga mangat jeut geumeubloe peu nyang perlee u rumoh siuroe-uroe bak pasai nyoe mantong. Ka peut uroe ulikot kamoe peuhah pasai nyoe," kheun Yasir.

Geuchik Yasir geupeutrang, Gampong Lambung geugunci mulai uroe Sabtu (28/3/2020), meunan lheuh na ureung di wilajah Kota Banda Aceh nyang positif COVID-19. Meunan lheuh geugunci gampong, geucoek peunutoh jak bagi bantuan keu mandum ureung gampong.

Geusomprot disinfektan rata lungkiek, peujioh bala nyoe. Foto" Abdul Hadi/acehkini

Selaen nyan, nibak uroe Seulanyan baroe (6/4), rata luengkiek lam gampong nyan geusomprot disinfektan nyang geupeubuet le aneuk muda. Nyan contoh di Gampong Lambung nyang jroh dan bereh meunan. []

Note: berita dalam bahasa daerah (Aceh) ini disampaikan sesuai kebijakan dari kumparan untuk para partner 1001 Media, bertujuan melestarikan bahasa daerah.