Parte Awak Awai Jinoe Geuboh Nan Tuha, Ka Geumulai Peutubiet Lagu Lom

Tuha, grup musik instrumental asai Aceh peutubiet lagu keuphon nyang geubri nan 'The Land'. Foto: Dok. Tuha

Teuntee hana aseng bak geulinyoe tanyoe ureueng Aceh nan Raket ngon Cupa Band. Jinoe na dua droe anggota band nyan awai ka geupeugot saboh grup baro nyang geuboh nan 'Tuha'.

Dua droe ureueng nyan na keuh Wen Axan ngon Opay. Tuha ka geupeugot phon bak awai 2020. Seulaen dua geuh, geubantu le sidroe teuk ureueng bak bideung manajemen, nakeuh Khairul Umami nyang seureng dihoi Gepe.

Nibak uroenyoe, Sabtu (30/5/2020), grup musik instrumental asai Aceh nyoe ka geupeutubiet saboh lagu keuphon nyang geubri nan 'The Land' bak channel youtube awak nyan, Tuha.

Lagu keuphon 'The Land' nyoe nakeuh bah rihoen manusia keu nasib bumoe nyoe nyang jinoe siat ka mulai weuh teuh oh takalon peukateun. Lewat lagu nyoe, Tuha neuk peutroh bak hate bansigom ureueng nyang deungo lagu nyan keu geujaga bumoe.

Wen Axan geupeugah, bak geupeugot lagu keuphon nyan abeh watee leubeh kureung dua goe minggu.

"Kali nyoe kamoe peutubiet versi audio dilee, keu video klip jih nyan akan tapeugoet sigra. Nyang pasti neuikot mantong channel youtube kamoe nyak bek tinggai tiep kamoe peutubiet lom ukeu," peugah Axan.

Wen Axan nyang rumeh blah unuen that. Foto: Dok. FB Ahsan Khairuna

Bak watee nyang sama, Opay geupeutrang chit bahwasajih Tuha heut that beuna nuansa musik nyang meulaen dari band-band nyang kana seulama nyoe di bumoe Aceh nyoe.

"Grup musik instrumental jinoe siat gohlom rame di Aceh. Awai kamoe meupike peu keuh ekna ureueng nyang tem nikmati, meunan lheuh kamoe bahaih lam tim, nyoe ka jadeh kamoe pileh bak jalur nyoe. Bismillah mantong, ka kamoe mulai," kheun Opay.[]

Note: berita dalam bahasa daerah (Aceh) ini disampaikan sesuai kebijakan dari kumparan untuk para partner 1001 Media, bertujuan melestarikan bahasa daerah.