Heboh Dukun di Pasaman Kanai Corona, Tukang Kaba COVID-19: Itu Indak Batua

Ilustrasi (Foto: ShutterStock)

Kini ko ado kaba nan sadang heboh bana, dukun di Kabupaten Pasaman, Sumatera Barat kanai corona, alah baserak pulo kaba itu di internet, ado lo media nan mambuek kaba itu, keceknyo dukun tu alah kanai corona lo.

Dek ulah kaba itu alah mulai heboh, Pemerintah Nan Tukang Sampaian Kaba Corona di Kabupaten Pasaman, W Hutabarat mangecek ga, kaba dukun nan kanai corona itu indak batua.

"Media nan manulih kaba itu sajo indak ado mananyo ka ka awak do, nyo buek sajo namo awak nan mengecek di situ. Salah kaba itu mah, alun dapek dipasti gai dukun tu kanai corona lah do. Awak sajo indak talok mangecek urang tu kanai corona sabalun hasia tes swabnyo kalua," kecek Hutabarat katiko ditalepon Langkan.id, Selasa (14/4).

Sabananyo, kato Hutabarat, urang Pasaman nan kanai corona, iyo ado barubek ka dukun, sampai ka tigo dukun gai nyo barubek, tim awak bagai alah mancari tau kaba itu. "Alah dipareso dek tim awak, kironyo urang nan kanai corona itu iyo ado barubek ka dukun, surang nan barubek ka dukunnyo, surang lai mangawanan sajo," katonyo.

Sudah tu, sajak hasia tes urang nan partamu di Pasaman tu kanai corona kalua, iyo sabana kanai corona nyo kironyo, tu urang dinas kesehatan mamareso sia sajo nan basobok jo urang tu lai, ado 38 urang, tamasuak jo urang nan mangawanan urang partamu nan kanai corona ka dukun tu, diparesolah urang-urang ko, jo dukun-dukun tu bagai.

"Alah dipareso, surang nan jaleh kanai coronanyo, urang nan mangawanan kawannyo ka dukun cako tu. Kalau tigo urang dukun tu, hasia pareso capeknyo (Rapid Test) indak ado kanai corona do, negatif hasianyo," jaleh Hutabarat.

Rencana kini ko, lai ka diulang pareso capek tu baliak. Ma tau, katiko pareso partamo, sadang sehat bana badan urang-urang tu, makonyo hasianyo negatif.

"Bisuak wak ulang baliak mamareso urang-urang ko. Nan jaleh, dari 38 urang nan dipareso tu, surang nan jaleh kanai corona nyo, nan mangawanan kawannyo ka dukun tu, kini nyo alah maasiangkan diri di Padang, ado tampek nan disadioan pemerintah, tapi indak di rumah sakik," kato Hutabarat.

Sakali lai dikecekan, kato Hutabarat, tigo urang dukun tu indak ado nan kanai corona sampai kini lah do. Kok ado kaba nan mengecekan dukun tu kanai corona, yo alah salah bana tu mah.

"Yo indak dapek diaka lo dek awak do, tibo-tibo sajo namo awak nan tatulih di media tu, antah dari ma lo nyo dapek kaba kalau ado dukun nan kanai corona di Pasaman ko. Nan jaleh, sampai kini ko, indak ado dukun di Pasaman nan kanai corona," keceknyo.

-----

*kumparanDerma membuka campaign crowdfunding untuk bantu pencegahan penyebaran corona virus. Yuk, bantu donasi sekarang!