Hora Falinggir Beking Ilang Stres Warga Manado

Foto: caas.gov.sg

MANADO - Bahora falinggir kong kase baku gate sampe putus, skarang jadi cara yang orang Manado mo beking supaya ilang dorang pe stres gara-gara so talalu lama badiam di rumah, lantaran ini panyaki Coronavirus Disease 2019 (COVID-19).

Yang beking unik, yang ja bahora falinggir bukang anak-anak mar orang tua yang so ada anak. Dorang bilang, bahora falinggir ini selain kase ilang stres, dorang le bisa mengenang dorang pe kehidupan waktu kecil.

Ini orang ja bahora falinggir bilang, ada kenikmatan sandiri yang dorang rasa waktu kase bakugate dorang pe falinggir. Apalagi pas kalau boleh mo kase putus tu benang orang laeng punya di atas udara.

"Rupa ada rasa plong kong gembira skali. Sama rasa dengan ada iko kejuaraan bola kong isi gol di menit-menit terakhir supaya mo menang. Memang rasa bangga skali kalau se putus orang pe falinggir," Stewart, orang asal Winangun ada bilang.

Sama dengan Maykel yang tinggal di Singkil bilang. Ini bahora falinggir dia pe asyik mo baku terek dengan tamang yang jadi lawang baku gate falinggir di udara.

"Pokoknya kalau so baku gate, samua tu kata-kata mo baku terek kaluar. Mar itu no yang beking lebe seru. Kong kalau skarang, nda perlu tako mo dapa se bubar, lantaran kalau bahora falinggir nda baku dekat musti baku jauh," Maykel bilang.

Sementara, Yandri Kandores, orang yang terkenal karena jago baku gate falinggir bilang, bahora falinggir musti ada skill yang bagus. Memang katu Yandri bilang, benang yang mo pake musti bagus. Mar, kalau skill nda bagus tetap mo kalah kalau bermain falinggir kong mo bakugate.

"Yang pertama itu skill bahora falinggir. Baru dia pe falinggir musti bijak. Baru abis itu dia pe benang. Kalau samua ada, so raja itu di udara. Mar memang musti skill samua," Yandri bilang.

Kiapa musti skill jago, Yandri bilang itu bahora falinggir apalagi mo bakugate musti tau slak bagemana mo kase lucur itu benang dengan mo kase tarek atau span tu banang di udara.

"Jadi musti tau kapan mo kase lucur iko angin, dengan kapan musti tarek kase cepat supaya tu musuh mo tagulung. Dengan jangan lupa, musti ada asisten tukang gulung benang, kalau nda malimbuku tetap," Yandri ada bilang ulang.

Selain falinggir for baku gate, ada le yang ja nikmati falinggir burung. Tu falinggir dorang mo hias kase besar-besar baru mo kase mengudara supaya dapa lia skali di langit.

Kamrin, salah satu orang yang suka dengan falinggir burung bilang ada kenikmatan dan kenyamanan saat bahora falinggir burung.

"Memang katu nda ada mo lucur tarek. Mar kalau di udara kong dia so badiam di udara, sedap skali ja lia," Kamrin bilang.

manadobacirita

-----------------

(Simak panduan lengkap corona di Pusat Informasi Corona)

*****

Yuk! bantu donasi atasi dampak corona.