Jang Kumabal, Manado So Jadi Daerah Transmisi Lokal Panyaki COVID-19

Tukang bicara Satgas COVID-19 Sulawesi Utara, dr Steaven Dandel

Pasien yang so positif tajangke panyaki COVID-19 di Sulawesi Utara (Sulut), per tanggal 7 April 2020 so tatambah jadi 8 samua. Baru-baru so ada tiga lagi yang takena tu panyaki yang bajangke karena virus SARS-COV-2.

Kong yang beking khawatir, ini tiga yang ada kena baru-baru, dorang nda ada riwayat ada bajalang ka luar daerah. Jadi ini pasien-pasien ada tajangke hanya dari daerah sandiri.

Tu tukang bicara Satgas COVID-19 Sulawesi Utara, dr Steaven Dandel ada bilang, Kota Manado yang ibukota Provinsi Sulawesi Utara, memang so jadi daerah yang tu panyaki so bajangke di kampung sandiri atau istilah ilmiah transmisi lokal.

Dandel ada cumu, itu jaga kase bajangke panyaki COVID-19, so nda jaga datang dari orang-orang yang ada pasiar ka tampa yang so tajangke, mar so jaga bajangke dari dalam kota Manado sandiri.

"Sejak hari ini, Kota Manado, Sulawesi Utara dinyatakan sebagai salah satu daerah yang mempunyai bukti atau evidence transmisi lokal," Dandel ada bilang.

Makanya, Dandel bilang, torang skarang jang kumabal kong masih mo kaluar rumah kalau nda perlu, atau masih suka mo bakumpul-kumpul atau kongkow-kongkow di tampa rame. Soalnya, tu virus kalau mo bajangke nda mo pandang sapa, dia mo batempel akang.

Dandel kase masukan pa torang masyarakat, skarang so musti jaga hati-hati kong antisipasi samua yang ada pa torang pe sekitar, karena skarang so ada bukti kalau siapapun boleh mo kase bajangke tu virus di Manado.

Mar, Dandel juga bilang, bukang berarti so samua orang kong mo bawa itu virus SARS-COV-2. Makanya, Dandel harap, kalau mo kaluar rumah, pake masker dengan jaga jarak dengan orang. Kong, kalau sampe rumah jang lupa cuci tangan dengan jaga tu kebersihan.

"Maknanya adalah setiap warga Kota Manado, harus antisipasi bisa saja kemungkinan di sekitar kita ada orang bisa berpotensi menularkan. Tapi bukan berarti semua sudah bisa membawa COVID," Dandel ada bilang ulang.

febry kodongan/manadobacirita

*kumparanDerma membuka campaign crowdfunding untuk bantu pencegahan penyebaran corona virus. Yuk, bantu donasi sekarang!