Gantian Tukang Njaga Dampar Sepur Nggruduk DPRD Brebes Nakokna Formasi PPPK

Ketua Komisi III DPRD Brebes Achmad Mafrukhi wayah nrima audiensi puluhan PJL KA.

BREBES – Puluhan PJL utawa tukang njaga lawang dampar sepur nang Kabupatén Brebes pada nggruduk Gedung Déwan Perwakilan Rakyat Daérah, dina Rebo (9/11/2022). Dhéwéké nakokna nasibé kepibén soalé ora ana formasi Pegawai Pemerintah dengan Perjanjian Kerja (PPPK).

Padahal, jaréné, tugas PJL njaga lawang dampar sepur kuwé résikoné bahaya nemen. Wayah kerja selama 24 jam kudu ana personél sing njaga lan ngoperasionalna lawang manual. Termasuk, waktu pengabdiané sing rata-rata wis puluhan taun tugas dadi PJL.

Perwakilan petugas PJL, langsung ditampa daning Ketua Komisi III DPRD Brebes sekitar jam sanga awan. Audiénsi kuwé dipimpin langsung daning Ketua Komisi III Achmad Mafrukhi lan Wakil Ketua Tobidin.

Saliyané kuwé, uga teka anggota Komisi III DPRD Brebes liyané, Haryanto lan Mashadi. Melu ndampingi, anggota komisi lan Kepala Dinas Perhubungan Budi Dharmawan karo jajarané.

Forum komunikasi PJL, terdiri seka 100 personél sing tugas neng 13 titik perlintasan. Rinciané, saben pos dijaga 8 personél sing diatur jadwal pikét nggal dinané.

Curhatan lan keresahan PJL, diungkapna daning perwakilan Forum Komunikasi PJL Brebes Siswoyo (52), dhéwéké ngomong wis ngabdi mbuka nutup lawang dampar sepur wis 12 taun.

Malah, wayah nglakoni profési sing penuh résiko lan taruhané nyawa kuwé, honoré mung Rp 75 éwu per jadwal pikét nggal dinané. Mugané, angger diakumulasi neng sawulané maksimal 24-25 dina kerja.

“Pertanyaané, kepibén kejelasan nasibé dhéwék pada angger ora ana formasi PJL neng ASN kategori PPPK. Padahal, penghasilané dhéwék uga adoh seka kata layak,” jaré Siswoyo.

Padahal jaréné, PJL sempet olihna kabar apik sawisé dilakoni pemétaan dan pendataan pegawai honorér. Kekarepané, data PJL sing diakomodir Dishub bisa diakomodir neng formasi PPPK.

Tapi, jebulané usulan database kuwé ditolak KemenPAN RB lan BKN. Alesané, neng pemétaan formasi PPPK profési PJL ora ana kategoriné. Sebab, PJL mlebu kategori pengamanan liyané kaya sekuriti, supir lan cleaning service sing ora olihna formasi PPPK.

“Dhéwék ngarepna nemen, ana perhatian seka Pemkab lan DPRD nggo ngawal nasibé PJL. Sebab, angger tetangga sebelah bisa ngakomodir bisané Brebes ora?,” omongé.

Sementara kuwé, Ketua Komisi III DPRD Brebes Achmad Mafrukhi ngomong, sawisé nampa audiénsi perwakilan PJL pihaké ngaku siap nggo ngakomodir. Yakuwé, masilitasi PJL karo Dishub lan BKPSDMD nindaklanjuti diilangnané formasi PJL neng usulan PPPK.

“Rencanané, Komisi III uga pan ngawal formasi PJL maring KemenPAN RB lan BKN. Nggo bentuk aprésiasi maring pengabdiané sing akéhé sekitar puluhan taun,” jaré Mafrukhi.

Jaré Kepala Dishub Brebes Budi Dharmawan, pihaké ngaku wis ngupayakna dan masilitasi pemétaan lan pendataan PJL. Tapi, merga penjelasan seka BPKSDMD lan KemenPAN RB ora ngakomodir formasi PJL dadi PPPK.

“Pokoké, dhéwék siap ndampingi Komisi III wayah ngawal usulan PJL PPPK kuwé,” jaré Budi Dharmawan. (*)