Jembatan Sungai Pedes Brebes pan Dibangun Ulang, Warga Nganakna Slametan

Warga nganakna slametan nang perek Jembatan Sungai Pedes, dina Saptu (3/10/2022).

BREBES – Puluhan warga Dukuh Satir, Désa Kutamendala, Kecamatan Tonjong, Kabupatén Brebes nganakna slametan nang perek Jembatan Sungai Pedes, dina Saptu (3/10/2022).

Jembatan nang sisi kulon dalan nasional ruas Tegal-Purwokerto kuwé pan dibubrak nggo dibangun ulang. Acara slametan sing diisi karo doa bersama lan potong tumpeng ditekani daning tokoh masarakat lan warga kononan.

Supervisor proyék jembatan Sungai Pedes, Bagus Setyo, ngomong proyék pan dimolai karo mbongkar jembatan lawas. Selama proyék arus lalu lintas dialihna maring jalur jembatan nang sebelahé karo sistem contraflow.

“Lalu lintas kendaraan dialihna maring jalur sebelah karo sistem contraflow,” jaréné.

Jembatan pan dibubrak lan dibangun ulang karo konstruksi fondasi bore pile sing ukuran dawané 60 méter lan amba 11 méter. Proyéké ditargét rampung neng wulan Februari 2023 ngarep.

“Dawa jembatan awalé 50 méter pan didawakna dadi 60 méter lan ambané 11 méter, modél kontruksiné pada kaya jembatan sing sebelahé,” jaré Bagus.

Dhéwéké nambahi, jembatan lawas pan dibubrak total dadi pondasi pan diganti karo kontruksi anyar. Nggo pelaksana pembangunan PT Bukaka lan PT Hutama Karya. Sing dadi konsultan Indec CCME KSO.

Kepala Désa Kutamedala, Fathuri, sing teka neng acara slametan kuwé ngomong, jembatan Sungai Pedes umuré wis rada tua, dibangun lagi taun 1977. “Dhéwék ngrasa syukur jembatan sing wis tua kuwé saiki pan dibubrak lan dibangun anyar,” jaréné.

Dhéwéké ngarep-ngarep warga isa ndukung proyék dibanguné jembatan Sungai Pedes kuwé. (*)