Kepengin Adus Banyu Anget nang Pancuran 13 Guci Tegal, Wong-wong Pada Antri

Sejumlah wisatawan mandi di Pancuran 13 Guci, Kabupaten Tegal. (Foto: Bentar)

TEGAL — Sawisé Pancuran 13 dibuka, wong-wong sing pada plesir nang Objék Wisata Guci Kabupatén Tegal kudu lila ngantri jam-jaman nggo bisa adus banyu panas nang tempat kuwé. Soalé, jumlah pengunjung lan jam operasionalé ésih diwatesi.

"Dhéwék lan kluwarga wis sekitaréng 20 menit nang njero pemandian lan kiyé pan metu. Soalé, adus nang Pancuran 13 diwatesi mung 15 menit," tuturé Sudarmoko, salah siji pengunjung seka Pekalongan maring PanturaPost, dina Minggu (23/5/2021).

Sadurungé manjing maring Pancuran 13, dhéwéké ngaku kudu ngenténi sa jam nggo manjing nang pancuran kuwé. Sementara nang ngarep lawang manjing pancuran akéh wisatawan sing pada antri.

"Manjing pemandian kudu ngantri utawa diwatesi. Wayah tuku tikét ya kudu salah siji sing tuku tikét. Barang kaya kuwé ngenténi giliran manjing," jaréné.

Ardis Wibowo, Staf Balai Konservasi Sumber Daya Alam (BKSDA) Séksi Konservasi Wilayah (SKW) 2 Pemalang ngomong, sesuai karo aturan sing wis diterapna lan sesuai Prokes sing ana. Pengunjung Pancuran 13 diwatesi karo jumah 182 per rong jam lan pengunjung sing adus diwéin waktu 15 menit.

"Barang kaya kuwé pengunjung dipersilakna metu ébén bisa genténan maring pengunjung liyané. Hal kuwé nggo ngadohi pengunjung pada numpuk nang ngarepé lawang lan sajeronéng pemandian," jaréné.

Belih mung kuwé tok, jaré Ardis, pihaké ya terusan mékena himbuan maring pengunjung ngenani aturan sing ana nang pemandian kiyé.

"Dhéwék ngarti pengunjung pada kangen adus nang pancuran 13. Tapi kiyé ésih pandemi lan dhéwék nerapna aturan sing ana. Tim sing ana nang lokasi ya terusan nglaruhi lan méon informasi maring pengunjung permenit. Angger pengujungé pada angél diatur, dhéwék ya bisa nutup," jaréné. (*)