Madan Mambu Dikorupsi, Kasus Ambreké Museum Purbakala nang Brebes Lagi Dislidiki
·waktu baca 2 menit
PerbesarBREBES – Kejaksaan Negeri (Kejari) Brebes molai nylidiki kasus ambreké bangunan gedung museum Manusia Purbakala nang Désa Galuhtimur, Kecamatan Tonjong. Dingerténi, gedung sing nembé dibangun kuwé ambrek neng bagian ngarepe.
“Neng tanggal 21 Juli 2022 wis molai nylidiki kasus dugaan tindak pidana korupsi neng proyék bangunan museum nang Désa Galuh Timur, Kecamatan Tonjong, Kabupatén Brebes, neng TA 2021 Dinas Kebudayaan dan Pariwisata Kabupatén Brebes. Kiyé berdasarna Surat Perintah No: Print-02/M.3.30/Fd.1/07/2022 tanggal 21 Juli 2022,” jaré Kepala Kajari Brebes, Mernawati, dina Jemuah (22/7/2022).
Seka hasil pemeriksaan, jaréné, penyidik nemukna struktur bangunan sing kepasang dinyana ora sesuai karo spésifikasi standar sakepibén sajroné kontrak. Mugané ngakibatna rusaké bangunan kuwé.
“Nggo proyék bangunan museum kuwé wis diserahterimakna tanggal 30 Desember 2021 lan wis dibayarna 100 persén seka duit APBD Kabupatén Brebes. Tapi neng tanggal 5 Mei 2022 bangunan museum ambrek nganti ora bisa difungsikna,” ungkapé.
Sementara kuwé, Kasiintelijen Kajari Brebes Dwi Raharjanto ngomong, tim penyidik pan kerja secara maraton nggo nylidiki perkara kuwé.
“Dhéwék molai minggu ngarep mriksani saksi-saksi lan ahli sing kekait karo kuli bangunan museum nggo kepastian hukum,” tuturé.
Sadurungé, neng wulan Mei 2022 wingi, gedung Museum Manusia Purbakala nang Désa Galuhtimur, Kecamatan Tonjong, Kabupatén Brebes ambrek neng bagian ngarepé. Padahal museum kuwé nembé baé rampung dibangun akhir taun 2021 wingi karo anggaran APBD karo nilé kontrak tekan Rp 752 juta. (*)