Ngundang Artis Ibu Kota, Konser Musik nang Tegal Gagal Maning

Panggung konser musik di Tegal dibongkar.

TEGAL- Acara musik akbar sing direncanané diadakna nang Objék Wisata Pantai Alam Indah (PAI) Kota Tegal, ora sida lan laka kejelasan. Padahal karcis konsér sing pan nampilna artis ibu kota kuwé wis ditukoni.

Sadurungé acara Tegal Bahari Jazz 5- 7 Mei 2022 wungi uga ora sida. Saiki Amazing Tegal Festifal 2022 sing awalé direncanana diadakna 26-28 Agustus uga ora sida.

Panggung sing wis ngadeg nang kawasan PAI sing rencanané nggo péntas 26 artis lan band papan atas dibubrak maning, dina Jemuah (26/8/2022) ésuk.

“Batal,” jaré Kepala Bidang Pariwisata Dinas Pemuda Olahraga dan Pariwisata (Disporapar) Kota Tegal Maman Suherman, wektu dihubungi PanturaPost.com, dina Jemuah.

Maman njelasna, acara konsér akbar kuwé yakuwé murni penyelenggara neng luar Pemkot Tegal. “Kuwé EO (event organiser) mandiri ora ana kaitané karo Pemkot,” jaré Maman.

Maman dhéwék ngaku kagét karo dibubraké panggung nggo konsér. Sing dadi Bidang Pariwisata, mung keanggonan tok dadi pengelola PAI.

“Kabéh persyaratan wis dipenuhi tapi (infoné ndadak) ana konflik internal EO,” jaré Maman.

Salah siji warga sing wis kadung wis tuku karcis, Zami ngaku kecewa karo dibatalnané acara kuwé. “Wis tuku rong tikét VIP nggo konsér dina ketelu ana Jrock lan Kotak,” jaré Zami.

Sementara kuwé, salah siji artis sing rencanané tampil, Kotak Band metung akun resmi instagramé uga nginformasikna ora sida manggung nang Kota Tegal.

“Tanggal 28 Agustus pindah maring Kutai Kertanegara, durung jodoné karo Tegal saiki, muga-muga kapan-kapan bisa jodo. SIAP MENGHANTAM KUTAI,” kaya kuwé tulisé akun kotakband_. (*)