Nyediakna Bis Nggo Ngangkut Karyawan, PT BIG Digrudug Supir-supir Élep Brebes

Welasan mobil élep wayah demo maring pabrik PT Bintang Indokarya Gemilang (BIG).

BREBES — Puluhan supir élep jurusan Losari-Brebes—Tegal pada démo nang Dalan Pantura Brebes, dina Slasa (5/4/2022). Welasan mobil élep diparkir nang ngarep pabrik PT Bintang Indokarya Gemilang (BIG) sing ana nang Jalur Pantura.

Dhéwéké protés merga pihak perusahaan wis nyediakna bis nggo antar jemput karyawan. Dhéwéké ya ndesak ébén PT BIG ora nyediakna bis karyawan merga dianggep pan nguduna penghasilané supir-supir.

Patang perwakilan supir angkutan dikongkon manjing daning pihak perusahaan nggo nglakoni audiénsi. Salah sijiné Eling Tri Wiratno.

Eling ngomong anané bis sing disediakna nggo karyawan, pan nguduna penghasilané supir-supir élep.

"Dhéwék dadi sopir angkutan umum uga dikejar setoran harian daning sing duwé armada. Karo anané bis karyawan kiyé otomatis pan nguduna penghasilané dhéwék," jaré Eling.

Sementara kuwé, jaré Kepala Bidang Lalu lintas Dishub Brebes, M. Reza Prisman, jumlah armada sing disediakna PT BIG kiyé ora pan ngurangi penghasilané supir-supir angkutan élep.

Reza ngomong, disediaknané armada kiyé nggo menuhi sarana lan prasarana perusahaan, kekait analisis dampak lingkungan dan lalu lintas (Amdal Lalin).

"Pas ndirikna perusahaan kuwé kudu ana Amdal Lalin sing salah siji neng antarané yakuwé perusahaan kudu nyediakna bis nggo karyawan," jaré Reza Prisman.

Kekait karo penghasilané supir-supir angkutan élep, jaréné, jumlah karyawan PT BIG énggal 10.000 wong. Sedengé, pihak perusahaan mung nyiapna sacuil armada bis antar jemput lan saiki ésih neng tahap uji coba.

Karo jumlah karyawan sing lumayan akéh, jaréné ora pan ngurangi penghasilané supir angkutan.

"Ndéyan dhéwéké (supir) ngarti bis-é ana akéh. Tapi kan nyatané mukur sacuil. Ana bis sing pan antar jemput maring arah wétan lan ana sing antar jemput maring arah kulon," jelasé.

Perwakilan perusahaan PT BIG, Edi Suryono, nyatakna pihaké mung nyediakna telung unit armada bis antar jemput karyawan sesuai karo aturan Amdal Lalin. Jaréné, angkot utawa élep ora bisa dijangko kabéh karyawan. Terutama nggo karyawan sing balik nang ndhuwuréng jam enem soré.

"Angger jam enem soré kuwé wis laka angkutan. Karyawan pan balik uga kéder. Disediaknané bis antar jemput kiyé ora pan ngurangi penghasilané supir angkot. Dhéwék wis jelasna maring dhéwéké (supir élep)," pungkasé. (*)