Ora Bisa Ngetém nang Pasar Pagi, Supir Angkot Kota Tegal Wadul maring Dishub

Supir angkot wayah wadul maring Dishub Kota Tegal.

TEGAL – Welasan supir angkot pirang-pirang jurusan pada ngresula ora bisa ngetém senajan sedélat nggo nggolét penumpang nang ngarep Pasar Pagi Kota Tegal nang Jalan Ahmad Yani.

Dhéwéké ya wadul maring Kantor Dinas Perhubungan (Dishub) Kota Tegal, nang Jalan Sangir, Tegal Timur, dina Senén (31/10/2022).

Salah siji supir angkot jurusan Tegal-Banjaran, Hasani, ngarepna ana lahan parkir nggo ngenténi penumpang. Termasuk jalur sa arah sing dianggep kurang éféktif.

“Dhéwék nuntut bisa disediakna lahan ngetém. Keloro, arus sa arah diubah. Tapi yén ora bisa ya dhéwék njaluk lahan nggo ngetém tok. Soalé yén dhéwék mandeg neng pinggir dalan mengko didukani (tilang) daning Polisi,” jaré Hasan.

Senajan durung kebentuk paguyuban utawané komunitas, supir-supir angkot tetep disambut apik daning pihak Dinas Perhubungan.

Kepala Bidang (Kabid) Lalu Lintas Dishub Kota Tegal, Ahmad Rofii, ngaku nampung keluhané supir-supir angkot.

“Dadi pancén dhéwéké ngeluhna sempité lahan parkir nggo ngetém ngenténi penumpang,” jaré Rofii.

Saliyané kuwé, jaré Rofii, supir-supir angkot uga ngusulna ébén jalur sa arah nang Jalan Ahmad Yani diubah. Seka awalé ngidul maring ngalor, dadi ngalor maring ngidul.

Rofii ngaku wis nguduna tim nggo nglarifikasi. Soalé, supir angkot ora bisa parkir neng Jalan Ahmad Yani, soalé dinyana ana pirang mobil ndéké sing manggoni umah utawa toko sing parkir sajegé ésuk nganti soré.

“Ana mobil papat sing dinyana ndéké sing manggoni, sing parkir neng lahan sing biasa nggo ngetém. Wis dhéwék uduna tim nggo bisa koordinasi,” jaré Rofii.

Jaré Rofii, supir angkot jurusan Tegal-Banjaran, Tegal-Kemantran lan Tegal-Adiwerna, pada ngomong siap nggo tertib yén lahan parkir kuwé bisa dimanfaatna dhéwéké nggo genténan ngenténi penumpang. (*)