PSBB nang Kota Tegal: Dalan Ditutupi nganti Kantor Pada Prei

Ilustrasi Wali Kota Tegal. (Desain PanturaPost)

TEGAL – Pembatasan Sosial Berskala Besar (PSBB) sing diajukna daning Pemkot Tegal akhire olih persetujuan sing Kemenkes RI. Wali Kota Dedy Yon Supriyono nyampekna, dilaksanaknane PSBB pan dilakoni nang rong tahap utawa wolulikur dina. Termasuk karo rong dina nggo persiapane.

"Kota Tegal pan nerapna PSBB molai 23 April anjog 23 Mei utawa nang rong tahap," jare Wali Kota Dedy Yon, maring wartawan nang Bale Kota Tegal, Jemuah (17/4/2020) .

Dedy ngemukakna, ditetapnane PSBB kuwe wis ana nang jero surat putusan Mentri Kesehatan RI nomer HK. OI.07/Menkes/258/2020 ngenani PSBB nang Kota Tegal. "Kota Tegal diwekena ijin nggo nganakna PSBB. Kepribena Kota Tegal wis dadi zona abang, termasuk ana warga sing positif," jare Dedy.

Dalan ditutup maning

Ujare Dedy, mengkone Pemkot pan nutup maning patang akses lawang manjing. Karo kaya kuwe, total ana patangpuluh sanga titik sing ditutup termasuk nang wilayah perbatesan.

Mung ana siji akses manjing nang dalan Pancasila utawa nang ngarep Kantor Dinas Kesehatan Kota Tegal sing pan dijaga telungpuluh petugas.

Lampu-lampu pada dipateni

Warga Kota Tegal ora olih metu umah wayah bengi. Kabeh lampu dalan lan tempat rame-rame liyane uga pan dipateni total.

Dedy ngungkapna, warga kudu meneng nang umah lan ora olih yag-yagan nang jaba angger laka keperluan sing penting nemen. "Wayah bengi kabeh warga kudu ana nang umah. Ruang publik, lampu dalan pan dipateni kabeh anjog esuk," jare Dedy.

Ujare Dedy, saliyane nggo alesan kesehatan eben kehindar sing potensi nulare virus corona utawa COVID-19, uga demi keslametan sing potensi perbuatan sing ora-ora.

Ilustrasi Wali Kota Tegal. (Desain PanturaPost)

"Aja kosih ana maling nang umah wayah lampu dalan dipateni. Aja uga metu umah, aja pada nang dalan mbokaneng ana begal lan liya-liyane," jaluke Dedy.

Dipatenine kabeh lampu dalan, khususe dalan Protokol Kota Tegal sing sadurunge wis dilakoni Pemkot Tegal wayah local lockdown. Sawise evaluasi lan rubah istilah dadi isolasi wilayah, lampu akhire diurubna wayah jam rolas bengi nganti esuk.

Kantor pada prei

Diterapnane PSBB nang Kota Tegal bakal duwe dampak nang pirang-pirang sektor. Kaya kantor-kantor. Senajan Dedy durung ngrinci kriteriane kaya apa mengkone. "Kantor-kantor uga kudu prei," ujare Dedy.

Hal kuwe dilakoni mung kur nggo nglindungi kesehatan lan keslametane warga. Apamaning Kota Tegal esih dadi kota sentral sing nggo nyambut gawe wong-wong sing daerah liya.

"Kota Tegal dadi central city nang endi akeh wong-wong mampir maring Kota Tegal. Kaya sing Brebes, Slawi lan Pemalang," Dedy nerangna.

Tuku panganan kudu dibuntel

Senajan Pemkot Tegal ngolihi tetep buka, tapi warung ora olih nglayani wong sing pada tuku kuwe mangan nang tempat. Dedy negasna, warung mangan mung olih nglayani wong tuku pesen onlen utawa digawa balik sing-tuku.

"Bakul sega ora olih nglayani madang nang warung. Mung olih delivery order, pesene onlen utawa dibuntel," omonge Dedy.

Dedy ngarep-arep, sapa bae bisa nuruti kebijakan-kebijakan sing pan ditrapna wayah ana PSBB. Soale kebijakane saiki wis cocog karo aturan sing kanggo. Lan warga bisa tertib pas lagi nglakoni PSBB, sing nang endi Kota Tegal kiye dadi kota pertama nang Jawa Tengah sing nerapna PSBB.

"Pemkot hukume wajib nglakoni PSBB sing apik, angger ora apik arane pelanggaran, termasuk masarakat kudu pada nurut," pungkase Dedy. (Panji)

***

*kumparanDerma membuka campaign crowdfunding untuk bantu pencegahan penyebaran corona virus. Yuk, bantu donasi sekarang!