Rega Ayam lan Gula Pasir nang Pasar Kota Tegal Mulai pada Mundak

Aktivitas pedagang Pasar Pagi Kota Tegal. (Foto: Dok. PanturaPost)

TEGAL – Rega pangan nang pirang pasar tradisional nang Kota Tegal mulai pada mundak pas enggal badanan. Conto pangan sing regane esih dhuwur yakuwe ayam ras karo gula pasir.

Dinas Koperasi UMKM dan Perdagangan Kota Tegal lagi dina Rebo (20/5/2020) nyatet, rega ayam ras sekitar Rp 41.000 nganti Rp 42.000 sekilone. Nek gula pasir tekan Rp 16.000 sekilone.

Kepala Bidang Pasar Dinas Koperasi UMKM dan Perdagangan Maman Suherman ngomong, rega keloro komoditi pangan kuwe kedeleng nang Pasar Pagi Kota Tegal, Pasar Kejambon, lan Pasar Langon. "Rega gula pasir karo ayam ras esih dhuwur, sementara liyane kedeleng esih normal," jare Maman wayah dibell PanturaPost.com, dina Rebo (20/5/2020) .

Maman ngomong, yen rega gula pasir pancen wis dhuwur sajege pertama wulan luasa. Jare kae, mundake gula lumayan dhuwur utawa ora normal. Padahal rega normal nang pasaran donge sekitar Rp 12.500 sekilone.

"Terus mundak pertengahan ramadan lan kiye ora biasa. Mundake dhuwur nemen, apa pengaruh imbauan nang umah bae, konsumsi gula dadi dhuwur?" omonge Maman.

Nek rega ayam ras, jare kae uga ngalami mundak awit sadurunge ramadan. "Ayam ras regane mundak saminggu enggal badanan. Mundake esih lumrah ora kaya taun disit rega mundak tapi stok kewates," jare Maman.

Maman ngomong, eben rega gula nang pasaran stabil, pihake bareng karo Perum Bulog pan nggelar pasar murah. Yakuwe ngedol gula saregan Rp 12.500 per kg.

"Saben bakul nang pasar nggo sing pada tuku diwatesi, maksimal 500 kg karo rega Rp 12.500 per kg. Saben pasar dijatah dodolan gula pasir 5 ton," pungkase Maman. (*)

***

*kumparanDerma membuka campaign crowdfunding untuk bantu pencegahan penyebaran corona virus. Yuk, bantu donasi sekarang!