Senajan Wulan Puasa, Wong-wong Olih Manjat Gunung Slamet

Puncak Gunung Slamet (dok panturapost.com)

TEGAL — Neng wulan puasa, wong-wong olih manjat Gunung Slamet. Soalé jalur pendakian via Permadi Guci, Kecamatan Bumijawa, Kabupatén Tegal, pan tetep dibuka. Pendakian wayah wulan puasa dadi favorit merga suasanané sing sepi.

"Biasané pendaki kaya kuwé, luwih kepéngin ngnikmati alam sawutuhé. Kaya taun sadurungé, wayah wulan puasa ana baé sing manjat gunung. Saiki baé wis akéh sing ngabari pan manjat nggo wulan puasa kiyé," jaré pengelola Basecamp Permadi Guci, Sofyan.

Senajan kaya kuwé, jumlah pendaki wayah wulan puasa biasané mlorod. Angger biasané neng akhir pekan nganti atusan pendaki, wayah wulan puasa paling sing manjat kuwé mung puluhan wong. "Biasané pendakian pan molai ramé maning kuwé wayah sawisé badanan utawa préi badanan," ungkapé.

"Nggo pendaki sing pan manjat wayah wulan puasa, dhéwék sarana nggo nganggo jasa porter seka basecamp, ébén bisa kepanto," imbuhé.

Nggo informasi, jalur pendakian Gunung Slamet via Permadi Guci Tegal nduwéni akéh fasilitas. Neng antarané kakus, mata air sing mlimpah, lan musala nang pos Amreta utawa pos papat (4). Saliyané kuwé, ana jalur tali webbing karo dawa atusan méter pas nuju maring pucuk.

"Kiyé yakuwé salah siji jalur favorit nang kalangan pendaki luar kota malah luar provinsi," pungkasé. (*)