Stoké Wis Tipis, Wali Kota Tegal Njaluk Dikirimi Vaksin Maning

Wali Kota Tegal Dedy Yon Supriyono.

KOTA TEGAL — Wali Kota Dédy Yon Supriyono njaluk Pemprov Jateng utawa Pusat gagiyan nambahi stok vaksin maring Kota Tegal. Soalé stok vaksin sinovac nggo dosis ke loro nang Kota Tegal wis énggal enték

"Nyong ngarep-arep seka Pemréntah Provinsi utawané Pemréntah Pusat ngesuk ésuk paling ora wis ana. Kuwé tuntutané dhéwék," omongé Dédy lubar mimpin Rakor Percepatan Vaksinasi, nang Adipura Koloman Balé Kota, dina Jemuah (6/8/2021).

Dédy ngarep-arep pemréntah gagiyan nanggepi. Dadiné vaksinasi nggo dosis ke loro sing nang endi dosis pertama uga wis nggunakna vaksin sinovac bisa terus lanjut.

"Dhéwék wis kirim surat lan keadaan kiyé wis dingerténi dadi aja kosih Pemréntah Provinsi lan Pemréntah Pusat nyia-nyiakna nggo daérah sing jelasé tenagané siap, genahé siap, fasilitasé siap uga wongé siap, tapi vaksiné diwékena kari," jaréné.

Dédy njaluk kekait distribusi vaksin diupayakna deléng kesiapan daérah nggo nganakna vaksinasi. Sebab, dikuwatirna kapan keléwat lawas dibenahi kualitasé uga pan temurun.

"Aja kosih vaksin kuwé uga nggo daérah-daérah sing ora siap, kiyé mengko vaksiné kesuwén, kiyé kan uga ora apik," jaré Dédy.

Dédy nambahi, kekait lanjutan program 1.000 Gerai Vaksin nang Kota Tegal, ésih bisa tetep dilaksanakna karo nggunakna vaksin Astrazeneca nggo dosis pertama lan nggo dosis keloro.

Sementara wong-wong sing wis divaksin Sinovac dosis pertama dilanjutna karo vaksin Sinovac nggo dosis keloro.

"Berarti nggo kekurangané masarakat Kota Tegal sing dosis ke loro diperlukna 110.000, nganti soré kiyé berarti dhéwék merlukna 10.500 vial maning kuwé sing mesti nggo dosis keloro," pungkasé Dédy. (*)