Tarlan Akhiré Mlebu Penjara Sawise Nyiram Banyu Umeb Maring Anak Tiriné

Tarlan (55), bapak-bapak sing nganiaya anak tiriné akhiré kecekel daning polisi nang Wilayah Kecamatan Larangan Brebes, dina Selasa (9/2).

BREBES - Bapak-bapak sing nganiaya anak tiriné, Tarlan (55), akhiré kecekel daning polisi nang Wilayah Kecamatan Larangan Brebes, dina Selasa (9/2).

Tarlan sempet mlayu sawisé nyiram banyu umeb maring anak tiriné. Gara-gara kelakuané, anak tiriné sing wis prawan kuwé ngalami luka mlodok nang saawak sakojor nang nggon gigir. Korban ya sempet diplayukna maring RS nggo ditambani.

Wayah dicekel nang nggon umpetané, pelaku ora nglawan babar blas. Neng adepané petugas, pelaku ngaku kajogan wis nyiram banyu umeb maring anak tiriné. Dhéwéké ngaku salah nglakoni tindak kekerasan kuwé merga kepancing émosi soalé digugah wayah turu tengah bengi.

"Bengi kuwé, nyong séwot soalé anaké ndodog-ndodog lawang wayah wong nang umah wis pada turu. Kuwé sekitaréng jam sewelas bengi bocah kuwé mbené balik. Sawisé dibukakna lawangé, bocah kuwé ngomong kasar maring nyong. Dadi nyong kepancing émosi latane tek tabok ping pindo. Barang kaya kuwé tek siram banyu umeb," omongé Tarlan nang adepané petugas, dina Rebo (10/2/2021).

Dhéwéké nerangna, wis manggon bareng karo korban, Rodiah (22) sing yakuwé anak tiriné sajegé Rodiah ésih cilik. Dhéwéké ya ngakoni anaké nduwéni keterbelakangan méntal, mugané sering ngomong kasar maring dhéwéké. Tapi, sadurungé kedadénan, dhéwéké ya wis ngélingna korban sing sokan balik tengah bengi.

"Sadurungé kedadénan nyong ngélingna soalé dhéwéké wadon lan aja sering balik bengi. Tapi korban pancén sering ngomong kasar, sing akhiré bengi kuwé nyong kepancing émosi," tambahé.

Sementara kuwé, Kasatréskrim Polrés Brebes, AKP. Agus Supriyadi ngomong, pelaku Tarlan yakuwé warga Désa Baros Kecamatan Ketanggungan. Pelaku sempet minggat lubar nganiaya anak wadon tiriné. Pelaku akhiré bisa dicekel nang dina Slasa (9/1/2021) nang Désa Sitanggal Kecamatan Larangan wayah umpetan nang umahé batiré.

"Penganiayaan sing dilakokna maring anak tiriné kuwé kedadénané nang tanggal 5 Fébruari bengi. Latane minggat lan mbené dhéwék cekel wingi tanggal 9 Fébruari," omongé Agus Supriyadi.

Kronologiné kuwé molai wayah korban Rodiah balik maring umah lan ndodog-ndodog lawang umah rosa nemen. Soalé pelaku Tarlan krasa keganggu wayah turu, dhéwéké ya kepancing emosi sing akhiré nganiaya korban. Pelaku nyiram banyu umeb sing dijukut seka pawon.

"Ndéan, merga turuné keganggu dadi pelaku nganiaya korban. Pelaku njukut banyu umeb latané nyiram nang nggon gigir ngantikan gigiré mlodok," omongé.

Gara-gara nganiaya anak tiriné, pelaku dikenani Pasal 44 Undang-undang Kekerasan Dalam Rumah Tangga (KSRT) karo ukuman nang ndhuwuréng limang taun penjara. Lah, nggo pirang barang bukti sing diamankna petugas, nang antarané siji téko, ngantikan klambi sing dienggo korban wayah kedadénan. Saiki, pelaku wis diblesekna maring penjara Makopolrés Brebes. (*)