Hayeu! Aneuk Miet Sikula SMK di Aceh Dipeugot Masker Nyang Dijok Pre Keu Ureung

Aneuk sikula SMK 3 Banda Aceh watee keuneuk jak bagi-bagi masker ija nyang kalheuh dicop bak Simpang Limoeng, Banda Aceh, Hameh (9/4). Foto: Ata Disdik Aceh

Cukop brat hayeue aneuk miet Sikula Meuneungoh Kejuruan (SMK) 3 Negeri Banda Aceh, Aceh. Adak pieh teungoh watei meureunoe ilmee di rumoh, aneuk-aneuk nyang gigeh nyan ditem peugoet masker ngoen ija nyang na bak rumoh.

Seulaen nyan, nyang meutamah bereh lom, ubena masker nyang kaleuh dicop nyan hana dipubloe, teutapi syit dibri pre lagei bungong jaroe keu ureung nyang ula-uli bak jalan. Masker ija nyan nakeuh jeut keu dabeueh ngoen toep abah ureung mangat jioh nibak peunyaket taeun Corona atawa COVID-19.

Haba nyang acehkini peusapat, masker peuneugoet aneuk miet sikula nyan dijok keu ureung me gari meusen ngeun moto nyang meuputa sideh di Simpang Limoeng, Kota Banda Aceh, bak uroe Hameh (9/4/2020) beungoh.

Ibuk Wakil Ketua PKK Aceh, Dyah Erti Idawati, roh lam jak bagi-bagi masker ija nyang kelheuh dicop le aneuk sikula SMK 3 Banda Aceh. Foto: Ata Disdik Aceh

Kepala SMK Negeri 3 Banda Aceh, Salma, geupeugah aneuk miet sikula nyang cop masker nyan nakeueh nyang seulama nyoe dimeureunoe bak jurusan Kompetensi Tata Busana. Jumlah aneuk miet sikula nyan 150 droe.

Salma geupeutrang, sidroe aneuk miet sikula geuyue cop masker 10 sampe 15 oen sapo seubagoe tugaih ji rumoh. Lheuh dicop, masker nyan baro geupeusapat. Ban lheuh meusapat ban bandum masker, geujok teuk keu ureung-ureung lam gampong atawa nyang meulikak-likak bak jalan.

"Bahan ija untuk cop masker nakeuh ija nyang seulama nyoe leubeh bak meucop bajei atawa ija-ija leubeh nyang hana meupakek le," kheun Salma nyang diteurimong acehkini, Kamis (9/4).

Masker ija ata dicop le aneuk sikula SMK 3 Banda Aceh geubagi-bagi keu ureung ula-ula bak jalan di Simpang Limeng, Hameh (9/4). Foto: Ata Disdik Aceh

Buet peugeut masker dari ija nyan, kheun Salma, ditubiet bak watei seumike kareuna ureung nyan kahek that-that bak geumita masker bak keude-keude di peukan karap sibuleun nyoe. Hai dabeueh nyan syit meuseuke that ka seujak taeun Corona phon na di Aceh bak awai buleun Maret.

"Lheuh meujok-jok nyoe, kamoe langsong meujak cop lom masker dari ija lagei nyoe untuk kamoe jok pre keu ureung-ureung nyang peurlei. Masker nyoe jeut geupakek sabe-sabe le ureung nyan," sambong Salma.

Nyoe gamba peuingat pakek masker le Pemerintah Aceh keu tapeujioh droe dari taeun Corona.

Keu contoh barang, kheun ibuk Salma, ureung nyan kaleuh tom geujok-jok keu ureung gampong nyang na di seulingka sikula SMKN 3 di Lhong Raya, Kota Banda Aceh. Seulaen nyan kaleuh syit geujok keu ureung nyang keurija bak Dinas Pendidikan Aceh.

Sep hayeue keun? Nyoe hana rugoe geupeusikula kareuna na untong keu ureung gampong.[]

Note: berita dalam bahasa daerah (Aceh) ini disampaikan sesuai kebijakan dari kumparan untuk para partner 1001 Media, bertujuan melestarikan bahasa daerah.