So Banyak Dokter deng Perawat Kena Corona, Warga Jang Baputar Bale Kalo Berobat
PerbesarMANADO - Gugus Tugas Coronavirus Disease 2019 (COVID-19) Provinsi Sulawesi Utara (Sulut), minta warga musti jujur, jang jaga badusta apalagi putar bale soal riwayat kesehatan atau ada bajalang kamana. Soalnya, kalau nda jujur, banyak hal yang nda bagus mo jadi, terutama for tenaga kesehatan yang harap-harap aman ada bakerja, nintau kote so ada yang bawa tu virus corona.
Tukang bicara Gugus Tugas COVID-19 Sulut, dr Steaven Dandel bilang, masyarakat musti bantu ini tim medis yang so jadi orang yang badiri paling muka mo baku mangada dengan COVID-19. Mo bantu bagemana, Dandel cuma mohon supaya nda ba putar bale pas mo baperiksa tu kesehatan di Fasilitas tampa baobat yang ada di Sulut.
Dandel mangaku, kalau masyarakat jujur nda putar bale, berarti so kase mudah ini tenaga medis, mo beking tu screening supaya mulus yang dia pe ujung, langsung tau mo beking apa tu tindakan paling bagus for pasien.
"Kalau ini pasien bacerita butul nda ba putar bale pas maso mo berobat, pasti samua boleh mo antisipasi apa yang mo beking. So itu kita kase inga, kalau ka tampa baobat, musti kase informasi yang betul dengan akurat, supaya sama-sama bae samua," Dandel ada bilang.
Dandel le mangaku kalau dia mangarti, skarang memang ada rasa tako dari masyarakat mo bacirita jujur alias nda putar bale. Soalnya, tu orang pe hina-hina kalau sampe ada panyaki, beking ini masyarakat le tako. Mar itu, nda boleh mo beking sampe masyarakat mo tako kase bilang dorang pe panyaki.
"Sebenarnya, jujur jo nda usah basambunyi. Yang mo korban itu banyak, mulai dari tu tenaga medis, orang yang ada satu sal dengan tu orang yang nda jujur itu le. Kalau dorang putar bale, kan tu keputusan yang tenaga medis mo ambe le keliru. Jadi, jujur jo kwa, karena samua ada bae," Dandel bilang.
"Ini penting skali mo kase tau, karena torang le sebagai tenaga medis, serba salah. So ambe tindakan kong salah, dapa bully di medsos. Nintau, ini pasien yang nda jujur alias putar bale," Dandel bilang ulang.
Kong, for tu tenaga medis, Dandel le bilang supaya patuh pa tu operasional yang so kase jadi aturan. Kalau ada di dalam zona merah, samua tu peralatan yang ada pake musti sesuai. Bagitu le dengan dia pe cara pemakaian, nimbole ada satu langkah yang talewat atau salah.
"Samua tindakan, musti sesuai dengan aturan yang so ada di tampa kerja. Ini mo cegah le supaya nda ada yang tajangke panyaki," Dandel bilang ulang.
febry kodongan/manadobacirita
***
*kumparanDerma membuka campaign crowdfunding untuk bantu pencegahan penyebaran corona virus. Yuk, bantu donasi sekarang!